وبائی امراض کے خلاف انسانیت کی ہزاروں سال پرانی جنگ War against Pandemic

وبائی امراض کے خلاف انسانیت کی ہزاروں سال پرانی جنگ War against Pandemic

یہ مضمون Yuval Noah Harari کی مشہورِ زمانہ کتاب Homo Deus سے ترجمہ کیا گیا ہے.

مترجم: علی عمار یاسر

قحط کے بعد ، انسانیت کے دوسرے عظیم دشمن طاعون اور متعدی امراض تھے۔ تاجروں ، عہدیداروں اور زائرین کے ایک نہ ختم ہونے والے سلسلے سے منسلک پُرہجوم شہر انسانی تہذیب کا سنگ بنیاد ہونے کے ساتھ ساتھ جراثیموں کے لئے ایک مثالی افزائش گاہ بھی تھے۔ اس کے نتیجے میں قدیم ایتھنز یا قرون وسطٰی کے فلورنس میں لوگ یہ جانتے تھے کہ وہ بیمار ہوسکتے ہیں اور اگلے ہفتے ان کی موت واقعہ ہو سکتی ہے ، یا یہ کہ ایک وبا اچانک ان کے پورے کنبے کو تباہ کر دے گی۔

اس طرح کی سب سے مشہور وباء جو Black Death کے نام سے جانی جاتی ہے ، 1330ء کی دہائی میں کہیں مشرقی یا وسطی ایشیاء میں اس وقت پھیلنا شروع ہوئی، جب پسو میں رہنے والے جراثیم یا کیڑے نے انسانوں کو پھیوڑوں کے کاٹنے سے متاثر کیا تھا۔ وہاں سے ، چوہوں اور پسوئوں کی فوج پر سوار ہوکر یہ طاعون تیزی سے پورے ایشیاء ، یورپ اور شمالی افریقہ میں پھیل گیا ، بحر اوقیانوس کے ساحل تک پہنچنے میں اسے بیس سال سے بھی کم وقت لگا۔ یوریشیا کی آبادی کا ایک چوتھائی سے زیادہ – ساڑھے سات کروڑ سے بیس کروڑ افراد اپنی جان سے ہاتھ دھو بیٹھے۔ انگلینڈ میں ، دس میں سے چار افراد کی موت ہوگئی ، اور آبادی سینتیس لاکھ سے بائیس لاکھ رہ گئی۔ فلورنس شہر نے اپنے 100،000 میں سے 50،000 باشندوں کو کھو دیا۔

حکام اس تباہی کے عالم میں بالکل بے بس تھے۔ اجتماعی دعاؤں اور جلوسوں کے انعقاد کے علاوہ ، انھیں اس بات کا کوئی اندازہ نہیں تھا کہ اس وبا کو پھیلنے سے کس طرح روکا جا ئے۔ جدید دور تک انسانوں نے بیماریوں کےلیے بری ہوا ، شیطان بھوتوں اور ناراض دیوتاؤں کو مورد الزام ٹھہرایا اور بیکٹیریا اور وائرس کے وجود کے بارے کبھی سوچا تک نہیں۔ لوگ فرشتوں اور پریوں پر آسانی سے یقین کر لیتے تھے ، لیکن وہ یہ تصور بھی نہیں کرسکتے تھے کہ ایک چھوٹے سے پسو یا پانی کے ایک قطرہ میں بھی مہلک بیماریوں کا ایک عظیم لشکر ہو سکتا ہے۔

Black Deathایک واحد واقعہ نہیں تھا ، نہ ہی تاریخ کا بدترین طاعون۔ اولین یورپی باشندوں کی آمد کے بعد امریکہ ، آسٹریلیا اور بحر الکاہل کے جزیروں میں مزید تباہ کن وبائی امراض پھیل گئے۔ کھوجیوں اور آباد کاروں کو علم نہیں تھا کہ وہ اپنے ساتھ نئی متعدی بیماریاں لا رہے ہیں جن کے خلاف مقامی آبادی کے جسموں میں کوئی مدافعتی نظام نہیں تھا۔ اس کے نتیجے میں 90 فیصد مقامی آبادی ماری گئی۔

پانچ مارچ 1520ء کو ایک چھوٹا ہسپانوی بیڑا کیوبا سے میکسیکو روانہ ہوا۔ جہازوں میں گھوڑے ، آتشیں اسلحہ اور کچھ افریقی غلاموں کے ساتھ 900 ہسپانوی فوجی سوار تھے۔ ایک غلام فرانسسکو ڈی یوگویا ایک انتہائی مہلک چیز لے کر چلا۔ فرانسسکو کو یہ معلوم نہیں تھا ، لیکن اس کے کھربوں خلیوں میں کہیں ایک حیاتیاتی ٹائم بم ٹک ٹک کر رہا تھا: چیچک کا وائرس۔ میکسیکو میں فرانسسکو کے اترنے کے بعد اس کے جسم کے اندر وائرس تیزی سے بڑھنے لگا ، آخر کار اس کی جلد پر خوفناک دھبے پڑ گئے۔ بیمار فرانسسکو کو سیمپولان نامی قصبے میں ایک مقامی امریکی خاندان کے گھر میں سونے کے لئے لے جایا گیا تھا۔ اس نے گھر والوں کو متاثر کیا ، اُن سے پڑوسی متاثر ہوئے۔ یوں دس ہی دن میں سیمپولان قبرستان بن گیا۔ وہاں سے بھاگنے والوں نے اس بیماری کو سیمپولان کے قریبی شہروں میں پھیلادیا۔ جب شہر کے بعد شہر طاعون کا شکار ہوئے تو خوف زدہ مہاجرین کی نئی لہروں نے میکسیکو بلکہ اس سے باہر کے علاقوں میں بھی اس بیماری کو پھیلا دیا۔

جزیرہ نما یوکاٹن میں مایاس کا خیال تھا کہ ایکپٹز ، اوزانکک اور سوجاکک ، تین شیطان دیوتا رات کو گاؤں گاؤں اڑ رہے تھے اور لوگوں کو اس بیماری میں مبتلا کررہے تھے۔ ایزٹیکس نے اس کا الزام دیوتاؤں تیزکلیپوکا اور زائپی پر یا شاید گورے لوگوں کے کالے جادو پر لگایا۔ پجاریوں اور ڈاکٹروں سے مشورہ کیا گیا۔ انہوں نے دعا، ٹھنڈے غسل ، جسم پر نفت کو رگڑنے اور زخموں پر کٹے ہوئے سیاہ بھونرے ملنے کا مشورہ دیا۔ کوئی فائدہ نہ ہوا۔ ہزاروں کی تعداد میں لاشیں سڑکوں پر سڑ رہی تھیں ، کسی کے ان کے قریب جانے اور دفن کرنے کی جسارت نہ ہوئی ۔ کچھ ہی دن میں خاندانوں کے خاندان تباہ ہوگئے ، اور حکام نے حکم دیا کہ لاشیں جن مکانات میں ہوں، انہیں منہدم کردیا جائے۔ کچھ بستیوں میں تو آدھی آبادی فوت ہوگئی۔

ستمبر 1520ء میں یہ طاعون وادیِ میکسیکو میں پہنچا تھا ، اور اکتوبر میں یہ ازٹیک کے دارالحکومت ، ٹینوچٹٹلن کے دروازوں پہ دستک دے رہا تھا – یہ 250،000 افراد پر مشتمل ایک نفیس شہر تھا۔ صرف دو مہینوں میں آبادی کا کم از کم ایک تہائی حصہ ہلاک ہوگیا. ہلاک ہونے والوں میں ازٹیک شہنشاہ کوٹلزہوک بھی شامل تھا۔ جبکہ مارچ 1520ء میں جب ہسپانوی بیڑے پہنچے ، میکسیکو میں دو کروڑ بیس لاکھ افراد آباد تھے ، دسمبر تک صرف ایک کروڑ چالیس لاکھ افراد ہی زندہ تھے۔ چیچک تو صرف ایک پہلا جھٹکا تھا۔ جب نئے ہسپانوی آقا اپنے آپ کو خوشحال بنانے اور مقامی لوگوں کا استحصال کرنے میں مصروف تھے ، میکسیکو پر ایک کے بعد ایک فلو ، خسرہ اور دیگر متعدی بیماریوں نے حملے کر دیے۔ یہاں تک کہ 1580ء میں اس کی آبادی 20 لاکھ سے کم رہ گئی۔

دو صدیوں بعد ، 18 جنوری 1778ء کو ، برطانوی مہم جو Captain James Cook ہوائی پہنچے۔ ہوائی کے جزیروں پر پانچ لاکھ افراد آباد تھے جو یورپ اور امریکہ دونوں سے مکمل علیحدگی میں رہتے تھے ، نتیجتاً انہیں کبھی بھی یورپی اور امریکی بیماریوں کا سامنا نہیں ہوا تھا۔ کیپٹن کک اور اس کے افراد نے ہوائی میں پہلا فلو ، تپ دق اور سیفلیس پیتھوجین متعارف کرایا۔ اس میں میں یورپ سے آنے والوں نے ٹائیفائیڈ اور چیچک کا اضافہ کیا۔ 1853ء تک ، ہوائی میں صرف 70،000 افراد زندہ بچے تھے۔

وبائی اموات نے بیسویں صدی میں بھی دسیوں لاکھوں لوگوں کو مار ڈالا۔ جنوری 1918ء میں شمالی فرانس کی خندقوں میں موجود فوجی فلو کے ایک مخصوص وائرس کے زیرِ اثر ہزاروں کی تعداد میں مرنا شروع ہو گئے ، جس کا نام Swedish Flu ہے۔ یہ فرنٹ لائن اب تک دنیا کے سب سے موثر عالمی سپلائی نیٹ ورک کا آخری نقطہ تھی۔ سپاہی اور اسلحہ جات برطانیہ ، امریکہ ، ہندوستان اور آسٹریلیا سے آ رہے تھے۔ تیل مشرق وسطی’ سے ، ارجنٹائن سے اناج اور گائے کا گوشت ، مالیا سے ربڑ اور کانگو سے تانبا بھیجا جا رہا تھا۔ بدلے میں ، یہ سب سپینش فلو سے متاثر ہو گئے۔ کچھ ہی مہینوں میں ، تقریبا نصف ارب افراد یعنی دنیا کی آبادی کا ایک تہائی حصہ اس وائرس کا شکار ہوگیا۔ ہندوستان میں اس نے 5 فیصد آبادی (15 ملین افراد) کو ہلاک کیا۔ تاہیتی جزیرے پر 14 فیصد کی موت ہوگئی۔ ساموا پر 20 فیصد۔ کانگو کی تانبے کی کانوں میں بیس فیصد مزدور ہلاک ہوگئے. پہلی جنگ عظیم میں 1914ء سے 1918ء تک 40 ملین افراد ہلاک ہوئے۔ ایک سال سے بھی کم عرصے میں مجموعی طور پر وبائی امراض نے 50 ملین سے 100 ملین افراد کو ہلاک کیا.

اس طرح کے وبائی سونامی کے ساتھ ساتھ ، جو انسانوں کو ہر چند دہائیوں بعد متاثر کرتا ہے ، لوگوں کو متعدی بیماریوں کے چھوٹے لیکن مستقل سلسلوں کا سامنا کرنا پڑا ، جس سے ہر سال لاکھوں افراد جانبحق ہوئے۔ جن بچوں میں ایمیونیٹی کی کمی تھی وہ خاص طور پر خطرے میں رہتے تھے ، لہٰذا انھیں اکثر ’بچوں کی بیماریاں‘ کہا جاتا ہے۔ بیسویں صدی کے اوائل تک ، تقریبا ایک تہائی بچے کم غذائیت اور بیماریوں کی وجہ سے جوان ہونے سے پہلے ہی انتقال کرجاتے تھے.

پچھلی صدی کے دوران انسانیت وبائی امراض ، بڑھتی ہوئی آبادی اور بہتر ٹرانسپورٹ کی وجہ سے مزید خطرے سے دوچار ہوگئی.
ایک جدید شہر، جیسے ٹوکیو یا کنشاسا، مرض پھیلانے والے جرثوموں کو قرون وسطی کے فلورنس یا 1520ء کےٹینوچٹٹلان کے مقابلے میں شکار کا کہیں زیادہ وسیع میدان فراہم کرتا ہے ، اور عالمی نقل و حمل کا نیٹ ورک آج 1918ء کی نسبت زیادہ موثر ہے۔ ایک ہسپانوی وائرس چوبیس گھنٹوں سے بھی کم وقت میں کانگو یا تاہیتی تک پہنچ سکتا ہے۔ لہٰذا ہمیں تو یہ توقع کرنی چاہیئے تھی کہ ہم ایک کے بعد ایک مہلک طاعون کے ساتھ ایک وبائی جہنم میں زندہ رہیں گے۔

تاہم ، پچھلی کچھ دہائیوں میں وبائی امراض کے واقعات اور اثرات دونوں ڈرامائی انداز میں کم ہوگئے ہیں۔ خاص طور پر ، عالمی سطح پر بچوں کی اموات تاریخ کی کم ترین سطح پر ہیں. جوانی تک پہنچنے سے پہلے فوت ہونے والے بچوں کی شرح صرف پانچ فیصد ہے۔ ترقی یافتہ دنیا میں یہ شرح ایک فیصد سے بھی کم ہے۔ یہ معجزہ بیسویں صدی میں طب کی بے مثال کامیابیوں کی وجہ سے وقوع پذیر ہوا ہے ، جس نے ہمیں ویکسین ، اینٹی بائیوٹکس ، بہتر حفظان صحت اور ایک بہت بہتر طبی ڈھانچہ مہیا کیا ہے۔

مثال کے طور پر ، چیچک کے قطرے پلانے کی عالمی مہم اتنی کامیاب رہی کہ 1979ء میں ورلڈ ہیلتھ آرگنائزیشن نے اعلان کیا کہ انسانیت جیت گئی ہے اور چیچک مکمل طور پر ختم کردی گئی ہے۔ یہ پہلی وبا تھی جو انسانوں نے کرہ ارض سے ختم کرنے میں کامیابی حاصل کی تھی۔ 1967ء میں چیچک نے ڈیڑھ کروڑ افراد کو متاثر کیا تھا اور ان میں سے بیس لاکھ افراد ہلاک ہوگئے تھے ، لیکن 2014ء میں ایک بھی فرد چیچک کا شکار نہیں ہوا تھا یا کم سے کم اس کی موت واقع نہیں ہوئی تھی۔ فتح اتنی مکمل ہوگئی ہے کہ آج ڈبلیو ایچ او نے انسانوں کو چیچک کے حفاظتی ٹیکے لگانا بند کردیے ہیں۔

ہر چند سال بعد ہم کسی ممکنہ نئے طاعون کے پھیلنے سے گھبرا جاتے ہیں ، جیسے 2002/3ء میں سارس ، 2005ء میں برڈ فلو ، 2009-10ء میں سوائن فلو اور 2014ء میں ایبولا۔ لیکن موثر انسدادی اقدامات کی بدولت ان بیماریوں کے متاثرین کی تعداد نسبتاً کم ہوگئی ہے۔ مثال کے طور پر سارس نے ابتدائی طور پر ایک نئی بلیک ڈیتھ کا خدشہ پیدا کیا تھا ، لیکن آخر کار اس کا اختتام دنیا بھر میں ایک ہزار سے بھی کم افراد کی اموات کے ساتھ ہوا۔ مغربی افریقہ میں ایبولا پھیلنے سے پہلے لگ رہا تھا کہ وہ قابو سے باہر ہو گیا اور 26 ستمبر 2014ء کو ڈبلیو ایچ او نے اسے “جدید دور میں سامنے آنے والی صحت عامہ کی سب سے بڑی ایمرجنسی” کے طور پر بیان کیا۔ بہر حال ، 2015ء کے اوائل تک اس وبا پر قابو پالیا گیا تھا ، اور جنوری 2016ء میں ڈبلیو ایچ او نے اسے ختم کردیا تھا۔ اس سے 30،000 افراد متاثر ہوئے (ان میں سے 11،000 افراد ہلاک ہوئے). اگرچہ پورے مغربی افریقہ میں بڑے پیمانے پر معاشی نقصان ہوا ، اور پوری دنیا میں اضطراب کی لہریں دوڑ گئیں۔ لیکن یہ مغربی افریقہ سے آگے نہیں پھیل سکا ، اور اس کی ہلاکتوں کی تعداد ہسپانوی فلو یا میکسیکن چیچک کی وبا سے مرنے والوں سے بہت کم تھی۔

یہاں تک کہ AIDS کا المیہ، جو بظاہر پچھلی چند دہائیوں کی سب سے بڑی طبی ناکامی ہے، لیکن اس میں بھی بہتری کی علامتیں دیکھی جاسکتی ہیں۔ 1980ء کی دہائی کے اوائل میں اس کے پہلی دفعہ بڑے پیمانے پر پھیلنے کے بعد سے ، تین کروڑ سے زائد افراد ایڈز سے مر چکے ہیں ، اور مزید لاکھوں افراد جسمانی اور نفسیاتی نقصان سے دوچار ہو چکے ہیں۔ نئی وبا کو سمجھنا اور اس کا علاج کرنا مشکل تھا کیونکہ ایڈز ایک انوکھی بیماری ہے۔ اگرچہ چیچک کے وائرس سے متاثرہ انسان کچھ ہی دنوں میں فوت ہوجاتا ہے لیکن ایچ آئ وی سے متاثرہ مریض ہفتوں اور مہینوں تک بالکل صحتمند نظر آتے ہیں ، بلکہ وہ نادانستہ طور دوسروں کو متاثر کر رہے ہوتے ہیں۔ اس کے علاوہ ، خود ایچ آئی وی وائرس بھی نہیں مارتا۔ بلکہ یہ مدافعتی نظام کو ختم کر دیتا ہے اور اس طرح مریض کو بے شمار دوسری بیماریوں سے دوچار کرتا ہے۔ یہ وہ ثانوی بیماریاں ہیں جو دراصل ایڈز کے شکاروں کو ہلاک کرتی ہیں۔ اس لیے ، جب ایڈز پھیلنا شروع ہوا تو ، یہ سمجھنا خاص طور پر مشکل تھا کہ کیا ہو رہا ہے۔ جب 1981ء میں ایڈز کے پہلے دو مریضوں کو نیویارک کے ایک اسپتال میں داخل کرایا گیا تھا ، تو ایک نمونیہ سے مر رہا تھا اور دوسرا کینسر سے۔

تاہم ، ان مشکلات کے باوجود ، اس پراسرار نئی وبا سے واقف ہونے کے بعد ، سائنسدانوں کو اس کی نشاندہی کرنے ، وائرس کیسے پھیلتا ہے اس کو سمجھنے میں ، اور اس وبا کو کم کرنے کے مؤثر طریقے تجویز کرنے میں صرف دو سال لگے۔ مزید دس سالوں میں نئی ​​دوائوں نے ایڈز کو سزائے موت سے دائمی مرض میں بدل دیا (کم از کم ان دولت مندوں کے لئے جو علاج معالجے کے اخراجات برداشت کر سکتے ہیں)۔ ذرا سوچئے کہ اگر 1981ء کی بجائے ایڈز 1581ء میں پھیلتا تو کیا ہوتا؟ تمامتر امکانات یہی ہیں کہ علاج تو ایک طرف، کسی کو بھی اس بات کا علم نہیں ہوتا کہ اس وبا کی وجہ کیا ہے ، یہ کس طرح ایک شخص سے دوسرے شخص میں منتقل ہوتی ہے ، یا اسے پھیلنے سے کس طرح روکا جاسکتا ہے. ایسے حالات میں ، ایڈز نے نسل انسانی کا ایک بہت بڑا حصہ مار ڈالنا تھا ، اس کے نقصانات بلیک ڈیتھ کے برابر، بلکہ شاید اس سے بھی زیادہ ہو جاتے.

ایڈز سے ہوئی ہولناک ہلاکتوں کے باوجود ، اور ملیریا جیسی طویل عرصے سے متعدی بیماریوں سے ہر سال ہلاک ہونے والے لاکھوں افراد کے باوجود وبائی امراض پچھلی صدیوں کی نسبت آج انسانی صحت کے لئے ایک چھوٹا خطرہ ہیں۔ بہت سارے افراد غیر متعدی بیماریوں جیسے کینسر اور دل کی بیماری سے یا صرف بڑھاپے سے ہی مر جاتے ہیں۔ اتفاق سے کینسر اور دل کی بیماری کوئی نئی بیماریاں نہیں ہیں – وہ قدیم زمانوں سے انسانیت کو لاحق رہی ہیں۔ پچھلے زمانے میں ، نسبتا بہت کم لوگ ان سے مرنے کے لئے کافی عرصہ تک زندہ رہتے تھے.

بہت سے لوگوں کو خدشہ ہے کہ یہ صرف ایک عارضی فتح ہے ، اور یہ کہ بلیک ڈیتھ کا کوئی نامعلوم کزن کسی کونے کھدرے میں ہمارا منتظر ہے۔ کوئی بھی اس بات کی ضمانت نہیں دے سکتا کہ آفتیں واپس نہیں آئیں گی ، لیکن یہ سوچنے کی کافی وجوہات ہیں کہ ڈاکٹروں اور جراثیموں کے مابین ہتھیاروں کی دوڑ میں ، ڈاکٹر زیادہ تیزی سے بھاگ رہے ہیں۔ نئے متعدی امراض بنیادی طور پر پیتھوجین جینومز میں اتفاقیہ تغیر کے نتیجے میں ظاہر ہوتے ہیں۔ ان تغیرات سے پیتھوجینز جانوروں سے انسانوں میں کود پڑتے ہیں ، انسانی قوت مدافعت پر قابو پاتے ہیں یا اینٹی بائیوٹک جیسی دوائیوں کے خلاف مزاحمت کرسکتے ہیں۔ آجکل اس طرح کے تغیرات ماضی کی نسبت تیزی سے پائے جاتے ہیں اور پھیلتے ہیں ، جس کی وجہ ماحولیات پر انسانی اثرات ہیں۔ پھر بھی دوائیوں کے خلاف دوڑ میں ، پیتھوجینز بہرحال قسمت کے اندھے ہاتھ پر انحصار کرتے ہیں۔

اس کے برعکس ڈاکٹر محض تقدیر پر انحصار نہیں کرتے۔ اگرچہ سائنس پر اتفاقات کا بہت بڑا قرض ہے ، لیکن ڈاکٹر کسی نئی دوا کے امکان کی امید میں مختلف کیمیکلوں کو ٹیسٹ ٹیوبوں میں نہیں پھینکتے۔ ہر گزرتے سال کے ساتھ ، ڈاکٹر زیادہ سے زیادہ بہتر معلومات جمع کرتے ہیں جو وہ زیادہ موثر ادویات اور علاج ڈیزائن کرنے کے لئے استعمال کرتے ہیں۔ اس کے نتیجے میں ، اگرچہ 2050 میں ہمیں بلا شبہ بہت زیادہ سخت جان جراثیموں کا سامنا کرنا پڑے گا ، تاہم 2050 میں دوا آج کل سے کہیں زیادہ مؤثر طریقے سے ان سے نمٹنے کے قابل ہوگی۔

2015ء میں ڈاکٹروں نے ایک مکمل طور پر نئی قسم کے اینٹی بائیوٹک یعنی ٹیکسیو بیکٹین کی دریافت کا اعلان کیا – جس پر ابھی تک بیکٹیریا کی کوئی مزاحمت سامنے نہیں آئی۔ کچھ اسکالرز کا خیال ہے کہ ٹیکسوبیکٹین انتہائی مزاحم جراثیم کے خلاف جنگ میں گیم چینجر ثابت ہوسکتا ہے۔ سائنس دان نئے انقلابی علاج بھی تیار کررہے ہیں جو پچھلی تمام دواؤں سے بالکل مختلف طریقوں سے کام کرتے ہیں۔ مثال کے طور پر ، کچھ ریسرچ لیبز نینو روبوٹ کا گھر ہیں ، جو ایک دن ہمارے خون میں بہہ سکیں گے ، بیماریوں کی نشاندہی کرسکیں گے اور پیتھوجینز اور کینسر والے خلیوں کو ہلاک کرسکیں گے۔ چھوٹے جرثوموں میں نامیاتی دشمنوں کا مقابلہ کرنے کے لئے 4 ارب سال کا مجموعی تجربہ تو ہوسکتا ہے ، لیکن وہ بایونک شکاریوں یعنی نینو روبوٹس سے لڑنے کے لئے صفر تجربہ رکھتے ہیں ، اور اس کے مؤثر دفاع کو تیار کرنا جراثیموں کےلیے دوگنا مشکل ہوگا۔

لہذا ابھی ہم یہ تو یقین سے نہیں کہہ سکتے کہ ایبولا کی کوئی نئی وبا، یا کوئی نامعلوم فلو دنیا بھر میں پھیل کر لاکھوں افراد کو ہلاک نہیں کرسکے گا ، لیکن ہم اسے ناگزیر قدرتی آفات کے طور پر نہیں مانیں گے۔ بلکہ ہم اسے انسانیت کی ناقابل معافی ناکامی کے طور پر دیکھیں گے اور ذمہ دار افراد کے سروں کا مطالبہ کریں گے۔ 2014ء کے موسم گرما کے آخر میں کچھ خوفناک ہفتوں کے لئے ایسا محسوس ہوا کہ ایبولا عالمی صحت کے حکام پر حاوی ہو رہا ہے تو فوراَ تحقیقاتی کمیٹیاں تشکیل دے دی گئیں۔ 18 اکتوبر 2014 کو شائع ہونے والی ایک ابتدائی رپورٹ نے اس وبا میں عالمی ادارہ صحت کے غیر تسلی بخش ردعمل پر تنقید کی تھی ، اور ڈبلیو ایچ او کی افریقی شاخ میں بدعنوانی اور نا اہلی کو وبا کا ذمہ دار قرار دیا تھا۔ اس وبا کے خلاف فوری اور شدید اقدامات نہ اٹھانے پر مجموعی طور پر بین الاقوامی برادری پر مزید تنقید کی گئی۔ اس طرح کی تنقید کا مفروضہ یہ ہوتا ہے کہ انسانیت کے پاس بیماریوں سے بچنے کے لئے علم اور اوزار موجود ہیں اور اگر اس کے باوجود کوئی وبا قابو سے باہر ہوجاتی ہے تو یہ خدائی غضب کی بجائے انسانی نااہلی کی وجہ سے ہے۔

ایڈز اور ایبولا جیسی قدرتی آفات کے خلاف جدوجہد میں انسانیت کا پلڑا بھاری ہو رہا ہے۔ لیکن خود انسانی فطرت میں موجود خطرات کا کیا ہوگا؟ بائیوٹیکنالوجی ہمیں بیکٹیریا اور وائرس کو شکست دینے کے قابل تو بناتی ہے ، لیکن یہ خود انسان کو ایک بے مثال خطرہ میں بدل دیتی ہے۔ وہی ہتھیار جو ڈاکٹروں کو نئی بیماریوں کی جلدی شناخت اور تدارک کرنے کے قابل بناتے ہیں وہ فوجوں اور دہشت گردوں کو اس سے بھی زیادہ خوفناک بیماریوں اور قیامت خیز جرثوموں کی تخلیق کرنے کا اہل بناتے ہیں۔ اس لیے امکان ہے کہ بڑی وبائیں مستقبل میں صرف اسی وقت انسانیت کو خطرے میں ڈالیں گی جب انسانیت خود ہی انہیں کسی بے رحم نظریے کی خدمت میں تخلیق کرے۔ وہ دور ختم ہوا جب انسانیت قدرتی وبائی بیماریوں کے سامنے بے بس کھڑی رہی۔ لیکن ہم شاید اس کی کمی محسوس کریں!